In camposant ogni festa l’andéa,
senza falo, a trovar i “pore paroni”,
al bel maz dei “so fior” la ghe portea,
tiradi su col cor. Che lagremoni,
che lagreme Maria vecia la fea
intant che inzenociada la preghea.

“Requiem aeternam”… erelo poch bon?
E siora Rosa…’n anzol aderetura,
“Lux perpetua”… del prete no parlon,
“luceat eis”…e la Laura, che creatura!
E ‘l piciol cussì presto svolà via…
parcossa po’, parché? “Ave Maria”…

Co sest, pian pian, la tomba la scoéa,
contenta de sentirli ‘na olta ancora,
de rencurarli. Atorno la Zerchéa
che tuto fossea posto come alora,
che i era tuti quanti insieme. Ah!
E i la ciaméa: “Maria, Maria…” “Son qua!”.

Rosetta Bozzoli Prosdocimi