Su ‘n te la sofita, là te ‘n canton
la me vecia valisa fata de legn e carton,
de polver la é cuerta e ‘n cin l’ é macada1
con su telarine2 la é là bandonada.
Cuanti cuei viadi che insieme on fat,
su e dó par i treni oppur caminando,
‘ndando a laorar in paesi stranieri,
lontan dai me cari i confini passando.
Te sta misera zaiba3,cuatro camise,
e n’pochi de straz da usar tel cantier,
an toc de formai pai momenti pì magri
e ‘n fiasco de vin che buta via i pensier!
Te ò usà de carega, da armadio, da tola
e par polsar te era ‘n cusin 4,
entro de ti la fameja i ricordi
che sempre par mi i era vesin.
Cuante le olte ciapandote in man,
che l’ultima fusse ò sempre sperà,
ma dopo al bisogn a l’era pi grant
e ‘ncora na olta partir me à toca.
Vecia compagna del me tribolar,
cuanti ricordi entro de ti
insieme passadi in tuti sti ani,
momenti che ormai tornar no i pol pì!
Ades te se qua de polver ben cuerta,
verso de mi al par che te varda;
cossì d’improvviso gnanca me acòrde,
che sora sta polver na gioza5 se slarga.

Rino Budel

1 macada = ammaccata
2 telarine = ragnatele
3 zaiba = valigia
4 cusin = cuscino
5 gioza = goccia (di una lacrima)